ភ្នំពេញ៖ នាយករដ្ឋមន្ត្រីកម្ពុជាសម្ដេចតេជោ ហ៊ុន សែន លើកទឹកចិត្តឲ្យមានការយកចិត្តទុកដាក់លើវិស័យទេសចរណ៍រវាងទីក្រុងហូជីមិញនិងភ្នំពេញតាមផ្លូវគោក ផ្លូវទឹក និងផ្លូវអាកាស។

ការលើកការជំរុញលើកទឹកចិត្តនេះគឺធ្វើឡើងក្នុងពេលដែលសម្ដេចតេជោអនុញ្ញាតឲ្យសមាជិកការិយាល័យនយោបាយមជ្ឈិមបក្សកុម្មុយនិស្តវៀតណាម និងជាលេខាគណៈកម្មាធិការបក្សក្រុងហូជីមិញ លោក ង្វៀន វ៉ាន់នេន (Nguyen Van Nen) ចូលជួបសំដែងការគួរសម និងពិភាក្សាការងារនៅវិមានសន្តិភាពរាជធានីភ្នំពេញនារសៀលថ្ងៃទី១៧ ខែធ្នូ ឆ្នាំ២០២២។

ជំនួយការសម្ដេចតេជោគឺលោក អ៊ាត សុផល្លែត បានឲ្យអ្នកសារព័ត៌មានដឹងថា លោក វ៉ាន់នេន បានជម្រាបពីកិច្ចសហប្រតិបត្តិការកន្លងមករវាងទីក្រុងហូជីមិញនិងទីក្រុងភ្នំពេញក្នុងការទប់ស្កាត់ការរីករាលនៃជំងឺកូវីដ-១៩ និងវិស័យដទៃទៀតរួមមានវិស័យទេសចរណ៍ និងការតភ្ជាប់ហេដ្ឋារចនាសម្ព័ន្ធនិងប្រជាជនផងដែរ។

ជាការឆ្លើយតបសម្ដេចតេជោ ហ៊ុន សែន បានសម្ដែងការគាំទ្រនូវកិច្ចសហប្រតិបត្តិការរវាងរាជធានីភ្នំពេញ និងទីក្រុងហូជីមិញ និងបានលើកទឹកចិត្តឱ្យមានការយកចិត្តទុកដាក់លើវិស័យទេសចរណ៍ទាំងផ្លូវគោក ផ្លូវអាកាស និងផ្លូវទឹក រួមទាំងជំរុញដល់កំណើនពាណិជ្ជកម្មប្រទេសទាំងពីរ៕